海底撈火鍋 (海之戀商場)

Open Now

Now Closed

第一次食海底撈聽聞服務好味道好，一次試試佢，前一日打嚟訂座都有位，中午準時去到，見到無乜人。我地個侍應叫小林，係幾有禮貌，好用心服務，見到我大肚仲送左禮物比我地，係一對鞋仔同埋D零食，都幾好。湯底我揀左麻辣、酸菜、蕃茄同清湯，用來煮麵（我嗌左寬粉條同麵）好好食，但我覺得其他食物質素真係唔得啦，芝士腸居然係雜嘜牌，唔係金妹牌，好難食，牛肉丸咬落都係粉，唔係潮州牛丸，係得炸魚皮好少少，最滿意居然係呢樣。至於牛肉同豬肉，質素都係不過不失，響鈴係最普通街市都買到一PACK PACK嗰種，其實同D任食質素差唔多，不過價錢就收你貴好多，埋單$647。我覺得要揀服務既話可以去，因為真係令我覺得好舒服，侍應不斷幫手FILL 湯底、FILL 野飲咁，但要好食呢，就唔使去啦。