撈喜 (Closed)

女人係時候要對自己好一啲，天氣開始轉涼，係時候要對自己補一補，補充下膠原蛋白！所以今日嚟到呢度，食朋友推介嘅花膠撈麵！正！ 一去到門口，見到有街坊喺度睇緊有咩食，職員都好用心咁推介。計過散叫同埋點餐，都係呢個較為抵食，所以就決定叫一個豪華啦。雖然餐牌寫咗特定既食物，但其實都可以轉，只要價錢唔會超出，或者補差價就可以。甘樣幾好，較為自由，可以自由選擇自己鍾意食嘅食物，自由配搭。原盅燉湯方面，我都係叫咗花膠燉湯，因為今日主要目的係為左食佢。個湯好濃郁，除咗有大大隻花膠之外，仲有雞肉、豬肉、杞子同埋雞腳等。燉湯唔錯，餐廳有湯券賣，可以考慮買翻啲，幾方便！花膠拎出嚟好大隻，算厚身，一食就知道好多骨膠原！哈哈！撈麵望落去好似好細咁，但係實際上好大碟，一定夠食。花膠一樣係好大，炆到好林，個汁唔會好鹹，撈埋食啱啱好。個麵軟硬適中，唔會好乾身。除咗花膠外，仲有一大隻冬菇，入味，好香，有新年嘅感覺。個餐仲包一個小食，我揀咗豬頸肉。豬頸肉好爽口，煎到脆脆地，肥肉唔多，點埋個麻醬食係絕配！好味。鍾意呢個餐有個菜，唔會淨係食肉咁油膩，食個菜健康啲！菜係烚熟，落少少醬油，無油更健康！無加一。令人回味既一餐！正！