小印度餐廳

Open Now

Now Closed

以前要食正宗嘅印度野呢就一定係去重慶大廈搵，但你知啦重慶大廈其實有時花多眼亂都唔知邊間好食，咁岩比我而家喺佐敦搵到一間舖頭仔，叫做小印度餐廳，就心郁郁想入去食啦。入邊面積唔係好大，但係個感覺好溫馨，燈光好足，坐得都幾舒服唔會覺得好黑媽媽，乾淨企理。餐牌有中文英文唔會唔識叫野食，雞羊牛海鮮一應俱全甚至素食餐牌都有。一叫完嘢食侍應就送上一個脆餅加一兜薄荷醬，脆餅好薄好脆，有少少辣，加埋個薄荷醬會酸酸地，有浸薄荷牙膏味，幾得意㗎。咖喱角好大嚿，入邊下一啲雜豆啦薯仔啦，好好食呀。隔離嗰個紅色嘅係係雞肉嚟嘅，加左啲檸檬汁落去，酸酸辣辣咁，好惹味。之後佢一想就上咗兩碗野，我用咗10秒時間先分到邊一個係咖喱，邊一個係燜黃扁豆。咖喱冇我想像中咁辣，香料好重，配搭埋d印度黃飯，一流啊！雞肉好軟熟，唔會柴皮。至於燜黃扁豆就唔好以為佢顏色好重會好重口味，其實係相對清淡的一味。個甜品真係太甜，我食唔到落去。總括嚟講，呢間印度餐廳唔錯，可以嚟食下。