INN - I’m Not Nothing (Closed)

行經好多次，以為呢間inn只係歎花茶之類所以冇去，今日聽到狗吠聲及見到鎂光燈不停閃，原來隔離chill inn有汪星人party，咁就索性去呢間地球人inn坐坐。播住爵士樂，裝修係幾優雅，白色主調，比較啱啲拎個手袋仔就出街嘅靚女嚟chill，因為啲圓枱係細到咖啡室嗰款，放兜餐具、一碟主菜、一杯飲品沒多餘空間，亦冇位放背囊，凳背係圓形亦掛唔到背囊，頗尷尬。先嚟兩碗跟餐粟米🌽湯，打得好碎，有啲似食粟米粥但有奶香，好幼滑👍🏻。烤焗西西里雞扒配菠菜忌廉意大利飯整得juicy，係塊雞扒冇切件又冇俾刀我有啲大意。加拿大慢煮豬肉眼配金巴車厘子醬，塊扒足有36號腳咁長，意外地巨形！連續切咗五六塊感到吃力，初時唔知係把刀鈍定塊扒硬，但食落口塊扒又軟硬適中，邊緣稍有筋位好嚼口，個車厘子醬係幾夾塊扒，係少得滯，還好有一抹黃芥辣填補，不足處係個配菜紅蘿蔔青豆有啲過熟發黃。食埋個藍莓斑戟，兒童豎拇指話必須5星。藍莓🫐極新鮮，個cream亦討好，不油不膩，配埋杏仁片、藍莓🫐、醬、班戟一口吃滋味無窮。自助落單唔駛嘥自己數據，可連接九展emax wifi ，速度夠播片。