小天使餐廳 (Closed)

係大概五點嘅時候，想食少少野先離開赤柱，但因為午餐食得太飽，所以三個人只是叫咗一個餐加一個pizza。當日入到去，只見到兩個等待埋單嘅客人，唔使等位。好在我哋早啲入去，仲可以食到午餐，如果唔係就剩番每人三百幾蚊嘅聖誕大餐。忌廉湯入面有南瓜茸，甜甜地，非常開胃。店員亦好主動比多兩隻碗我哋，三個人分一碗湯，真係唔係幾好意思。然後到意大利飯，係加左什菇同露荀。飯粒軟硬適中，煮得剛剛好。加上露荀非常爽脆鮮甜，啖啖口感豐富。午餐仲有兩隻芝士焗帶子，食落唔UN，但係就無乜鮮味。而pizza餅底香脆，加上少少火腿同沙律菜，食落清新，但唔算有咩驚喜。成餐嚟講最好食都係個意大利飯，其他就一般般啦。呢度環境都幾舒服，如果早啲嚟坐下傾吓計，都算係一個唔錯嘅地方。