Talk 2 DeCream (Closed)

晚飯過後，總會想搵啲甜品食吓，咁先算為晚餐畫上完美句號。呢間雪糕店為處於厚福街再轉入去嘅一段小路，在小巷中燈火通明，而且裝潢充滿少女味道，就吸引咗我哋過嚟。餐牌上嘅圖像見到佢嘅雪糕製作都非常精緻，而且配搭都特別，所以我哋就每人揀咗一款再share食。朋友係一個朱古力控，所以就點咗金箔朱古力軟雪糕。佢嘅軟雪糕係dark chocolate味，所以呈現深啡色，面頭再灑上一粒粒嘅金箔，簡直就係漆黑中嘅螢火蟲，而雪糕筒亦用上朱古力窩夫筒，賣相已經非常吸晴。軟雪糕充滿濃濃嘅朱古力味，由於佢係黑朱古力，食落唔會太甜，不錯。而我一向鍾情於玫瑰味嘅食品，所以就揀咗呢杯生蜂蜜玫瑰奶杯，聽講係佢嘅招牌雪糕🍦。店員話玫瑰雪糕之所以咁香，係因為用澳洲牛奶同佢哋自家製玫瑰水製作而成，所以每一啖都充滿玫瑰嘅清香🌹。而軟雪糕內有一層層Oreo碎，所以食到落底都仍有唔同口感同層次。面頭淋上紐西蘭蜂蜜，再灑上玫瑰花碎，最後仲有一片Oreo同紐西蘭純天然蜂巢，睇得出製作認真而有心思。其實仲有玉桂蘋果樹我都好想試，不過由於今日人丁單薄，唯有下次再嚟過。