青花亭 (Closed)

受疫情影響，遲左好多先食生日飯。朋友話想試呢間。最初以為深水埗地段未必有食店啱食生日飯，但原來又有驚喜。我哋升左級飲干邑龍蝦湯，超好味，除左龍蝦應該仲好海蝦一齊煮。我食嘅三文魚餅配泡椒蕃茄薯蓉，每件配菜都食得出好俾心機煮，唔係求其做個配菜俾你。個魚餅唔會太碎，仲見到啲三文魚粒，太碎的話就唔好食。朋友叫左個海蝦墨魚麵，佢話好好食，我食到三份一佢已經食晒。因為好食我哋再叫兩個小食試下。九層塔清酒煮蜆，好好食，唔會好似有啲舖頭係咁加鹽，個湯底個味好複雜，應該有秘方。另一個小食炸沙薑雞翼（跟餐）。沙薑味濃得嚟又唔會太搶。最初覺得深水埗收呢個價好貴，食完反而覺得好抵。順帶一題，佢個裝修都唔錯。