慶麵 (Moved) New Location

大角咀有好多小店，每次嚟都可以試到唔同嘅小店，好喜歡哩個小區。今次嚟到慶麵哩間中菜小店，位置非常方便，係天橋一行就到。店舖裝修簡約時尚。選擇分左幾類，款式都較為特別，可以話係嶄新嘅中菜。而且價錢合理，份量足。特色山葵雞絲冷麵係全晚嘅亮點。一大碗，麵條有咬口，青瓜絲幼細而爽口，雞絲尚算嫩。特色山葵醬將三種平庸嘅材料昇華。山葵醬不會過濃，恰到好處，質地好似沙律醬，味道清香，令人越食越開胃。另一款巴東牛肉條撈麵係濃味之選。牛肉份量都多，大大件，加入左好多香料去煮，所以味道較重。牛肉係有少少鞋。最正係d蘿蔔索哂d汁。不過，個撈麵嘅麵條煮過龍，太淋，口感欠奉。最後上一碟生煎包。本來係小籠包同生煎包中諗左好耐，最後都係香口嘅生煎包獲勝，小籠包留返下次再試。生煎包都好出色，即叫即整，要等。底部脆口，包面嘅蔥同芝麻令包更香口。一咬好多肉汁咇出嚟，肉汁又多又鮮甜。肉餡都幾多，豬肉都幾嫩，亦唔會有太多肥肉。哩個一定要親熱食！慶麵推介俾食厭左傳統中菜嘅人，哩到你會揾到味道不俗嘅新口味！