佐賀山田 (Closed)

同同為牛魔王嘅阿爸食嘢，揀咗青衣呢間任食美國牛小排火鍋，任食唔嬲。櫻花蝦沙嗲鍋香濃花生醬味，肉類充分吸收咗沙嗲味，唔洗點醬油。淡口味同小清新之選有真夏柚子湯。成個鍋有淡淡柚子香味，料頭入面都有好多柚子蓉。第一次試柚子鍋，連我呢個重口味都好鐘意呢個清香湯底。柚子鍋仲有6-7 隻大大隻蜆，蜆味令湯底錦上添花，個人覺得湯式配蔬果最正，蕃茄吸曬蜆味，好鮮甜。而配牛肉嘅話，相對下更食得出牛味。肉質高質，令我地瘋狂食牛小排。牛小排肉質鮮美，口感嫩滑。美國和牛油脂花紋較牛小排多，牛脂更多。而牛肩肉就口感係三款內最結實，較為有咬口。牛舌薄切，吸到湯味。配料選擇正常，有一兩款特別，例如魚板三文治同芝士蟹柳。但質素有驚喜，同平時街市買嘅唔同，丸類彈口，有食材鮮味，魚糕同埋墨汁丸都值得食。食到飽一飽都要食甜品食Meji雪條。平時冇點見、原來都有好多口味。食咗藍莓乳酪、抹茶紅豆同埋牛乳紅豆。排名係抹茶> 牛乳紅豆> 藍莓。最鐘意雪條入面練奶部分，雪到好凍帶點Q彈麻薯口感。