滿江紅小甜甜 (Closed)

睇鋪頭名最初以為係食甜品嘅😂，點知原來係一間食麻辣+甜品店。由於門口有少少凹入，路過都可能會miss咗㗎，裝修比較舊，但尚算企理。午市套餐粉麵飯都有，我最鍾意係烏江魚飯或者酸菜魚飯。因最近食得多熱氣嘢，今日清清地食個雞皇飯，大部分飯套餐都會跟例湯，時菜。雞皮係淡黃色，零脂肪，少少雞味，肉唔嚡，點附上嘅薑蓉味道剛好，例湯都可以，少味精。附送嘅時菜係白菜仔，落咗嘅豉油汁，送飯一流😆。同時叫蒸魚飯，佢今日好運最後一個都比佢食到🤣，因平時好快就售罄。蒸魚好大碟，我都幫口試下味先😂，魚肉無泥味，蒸得剛好，肉質結實唔嚡，重點係豉油較得好好味👍。另一個竹筒飯，呢個非常底食，又係經常售罄嘅菜式，只係$38！而且飯好足料，有冬菇，豬肉，魷魚煮得非常香，唔好睇佢竹筒咁細，都有碗半飯㗎！最後套餐係可以揀飲品或糖水，咁女士們大多數會揀糖水嘅🤣，款式有3種：蕃薯，腐竹，綠豆，想清下熱氣大家都揀綠豆，好有誠意咁有加臭草同海帶，甜味啱啱好，真係食多一碗都得呀🤤。又平又好食仲可以喺邊度揾👍👍