小神燈新派飯館 (Closed)

朋友住係將軍澳，推薦呢間小神燈，話係區內一間唔錯嘅中菜，探朋友後約一班人聚下就選了呢間餐廳。當晚吃了幾個特別菜式，爆膏奶油蝦，椒鹽瀬尿蝦同沙薑焗海花螺，都係近期推薦，當中最愛呢個沙薑焗海花螺，原來可以咁夾，完全無諗過可以咁整，雖然食完有少少覺得鹹，但係我都幾誠意推介呢個咁特別嘅整法。椒鹽瀬尿蝦絕對做得好好，不過瀨尿蝦係比較細隻，如果係斑馬瀨尿蝦嘅話應該會完美，送支啤酒真係最好。爆膏奶油蝦的確幾爆膏，但個奶油有點膩，送飯反而剛剛好好。叫小神燈招牌金沙鬼馬百花釀油條，好多人都大讚。最後加個三絲炒米粉同埋之前喺佐敦神燈食過好好食嘅蒜蓉蒸勝瓜，剛剛好夠飽。炒米粉顯示到呢間餐廳師傅嘅功力都真係唔錯。甜品仲送紅豆沙，同佐敦差唔多，服務係幾好。下次如果再去將軍澳探朋友玩嘅時候，唔一定要再叫到會，喺呢度一班人試多幾個小菜，應該係比到會更加好嘅選擇。