協盛大排檔 (Closed)

晏晝打電話嚟唔通，結果要親身嚟訂枱，重要坐係街邊。七點鐘到嘅時候已經全場爆滿，重有好多人等枱。伙記唔多夠，但如果唔介意自己招呼自己都算ok，而且老闆都好好傾。叫咗個咸菜蕃茄粉腸湯底，個湯幾好味，d 粉腸又夠粉，掂。食物有手切肥牛、四寶丸、羊片、雞片、脆鯇等，個肥牛好有牛味，而四寶丸就好似其他食評講咁正，彈牙又甜，其他火煱料都好有水準。另外叫咗滑雞煲仔飯，d飯索咗d雞油好好味，重有飯焦。小菜就食咗豆泡蒸魚雲同炸腰果蝦乾豆腐粒，前者唔錯，個魚雲夠新鮮，後者就出乎意料咁正:香口好味，送飯送啤酒都一流。呢到食品個人覺得非常滿意，價錢亦非常抵，七個人飲咗三枝啤酒食到飽晒都係六百零蚊。但如果對環境有要求的話就未必合心水。