Video
Read full review
2014-06-13
7833 views
XO仔最近喺舞場上認識咗一位來自希臘o既朋友D兄。D兄黎咗香港唔夠一年，對香港餐廳不大熟識，喺社交網站得知小肥經常四周覓食，並於openrice個平台上發表食後感想，佢覺得好得意，仲話如果有機會都想緊埋一齊去試食，睇下我點寫食評。哈，咁啱隔咗兩日，潮表弟突然約小肥表哥食飯，解釋話自己啱啱搵咗份part time喺份英文雜誌度寫「匿名食評」 ，第一編題材係開業只有數週o既「小蝶」，但係就唔想一個人去咁悶，所以想拉埋表哥邊食邊寫，希望人多啲，可以叫多幾味菜，不過講明埋單要AA制，因為佢只可以claim返自己嗰份 。小肥表哥又點會托表弟手踭呢，所以應約之餘，亦帶埋D兄一同去試新菜。顧名思義，「小蝶」此名取自蝴蝶，但何謂「小」呢？好客o既店主Jessica上前解釋，佢爸爸係采蝶軒（Zen）o既老闆，就好比喻一隻大蝴蝶，而佢所開o既新餐館就好似爸爸栽培出黎o既小蝴蝶咁，所以起名為「小蝶」，真係幾有意思 ！Jessica仲話遲啲六月會喺合和中心開多間同樣都係用蝴蝶做主題o既咖啡室，定名為Papillon，即「蝴蝶」o既法文。「小蝶」位於登龍街新建好o既金朝陽中心二期八樓，對於熟識銅鑼灣區o既
顧名思義，「小蝶」此名取自蝴蝶，但何謂「小」呢？好客o既店主Jessica上前解釋，佢爸爸係采蝶軒（Zen）o既老闆，就好比喻一隻大蝴蝶，而佢所開o既新餐館就好似爸爸栽培出黎o既小蝴蝶咁，所以起名為「小蝶」，真係幾有意思 ！Jessica仲話遲啲六月會喺合和中心開多間同樣都係用蝴蝶做主題o既咖啡室，定名為Papillon，即「蝴蝶」o既法文。
「小蝶」位於登龍街新建好o既金朝陽中心二期八樓，對於熟識銅鑼灣區o既小肥同表弟當然係唔難搵啦，點知唔係地頭蟲o既D兄卻因周圍都係地盤而迷路 。
「小蝶」室內o既支架、燈罩及廂房拉門都係以銅鐡所造，感覺就好似置身於一個大蝴蝶籠內咁，好襯個蝴蝶主題。
雖然餐廳有間廂房，但係房間好似個細啲o既蝴蝶籠咁，不但有種無形o既壓迫感，最大問題係通哂窿，係人都望到入去，冇咗應有o既私人空間 。
服務方面，除咗有幾位比較生手o既妹妹仔之外，負責我地張枱嗰位Sherry姐姐真係非常細心體貼，佢不但喺落單時介紹不同菜式，喺逞上食物時更加以講解食用方法。Sherry亦好留心食客o既需要，除咗不時換碟，見食客有困難夾餸，亦會施以援手，反應快得黎真係做足一百分架 ！
點餸前，老闆娘Jessica好大方地行黎我地張枱，略作介紹，話佢曾經喺外國修讀過廚藝課程，「小蝶」o既所有菜式都係佢同師傅精心研製而成，概念就係將一啲傳統o既菜式重新演繹，加插新派o既烹調方法及調味。因為我地三個人都係第一次黎，所以就叫咗多款廚師推介，先睇吓啲招牌菜式如何。
三小碟（$88）之鹵水牛展粒：用秘汁鹵製o既牛展粒涷食都唔會話好乾好硬，味道普通，只可以話不過不失啦。
三小碟（$88）之冰鎮花彫鮑：冰鎮鮑魚個心夠爽，鮑邊又夠脆，入口嗰陣酒香清涼得好舒暢 ，如果酒味可以再濃啲效果應該會更好。雖然餐牌上寫明係「冰鎮花彫鮑」，但係入口嗰陣酒香味似日本清酒多過花彫酒 。
三小碟（$88）之法芥千層薈：所謂「法芥千層薈」原來係炸層層疊o既腐竹加豆腐，咬落好鬆化，而且唔油膩，幾得意，不過小肥只係嫌唔多夠味。
菠蘿菠蘿咕嚕肉（$58）：餸名入面有兩個「菠蘿」係因為除咗咕嚕肉汁入面有菠蘿之外，咕嚕肉係用菠蘿包盛載住。聽落都覺得幾有創意，可惜個製成品卻非常失敗 ！問題一，咕嚕肉切得太細舊，份量太少，唔講真係唔知自己食緊咕嚕肉 ；問題二，調味汁同時間太甜太酸，喺唔夠肉o既情況下真係幾難頂 ；問題三，個菠蘿包同個咕嚕肉唔係好夾；問題四，無論係個菠蘿包定係咕嚕肉都唔夠熱。
鷓鴣海馬燉雪梨（$48）：全個餐牌入面只有湯嗰部份係冇英文翻譯，Sherry話此乃因為餐廳每日只造兩款湯，而且由服務生用英語講解湯料比外籍客人聽應該會比直譯更加容易明白。我地三個人兩款湯叫齊，結論係兩款湯底一樣，都係雞湯煲瘦肉；湯渣中o既雞肉都算嫩，不過瘦肉就好嚡好乾。如下圖所示，「鷓鴣海馬燉雪梨」入面真係有海馬架 ！雪梨湯好甜潤，不過就油咗少少。
生蠔Rock & Roll（$98）：用越南春卷皮包住o既生蠔炸得好夠乾身，而且非常香脆鬆化，係當晚小肥最欣賞o既一道菜 。
DIY咖喱牛腩（$73）：牛腩肉質軟熟，食得出同普通茶餐廳絕對有分別，咖哩味就唔多夠香濃，一般過一般；最大問題係個酥皮，又腍又涷，唔知點咁，我地三個人異口同聲地話個酥皮好多餘，劃蛇添足 ！
跳舞茄子（$38）：究竟點先可以令茄子做出跳舞o既效果呢？原來個答案好簡單，就係用木魚康舖上新鮮熱辣o既茄子上面。「小蝶」o既跳舞茄子不但爽口，D兄尤其欣賞茄子夠juicy，而且經過又燒又蒸等工序後茄子仍能保持原有o既質感，表弟對此亦讚不絕口 。
銀杏腐竹浸苦瓜（$38）：XO仔同D兄兩個對苦瓜都好抗拒，所以我地兩個都只係食咗一兩口；表弟話個苦瓜好靚，因為食落有陣甜甜o既aftertaste，相信依啲就係中國人所講o既「苦盡甘來」o既「甘味」 ！據Sherry所講，個苦瓜湯底為豆漿，所以特別滑，飲落的確如此，加上個湯香濃得黎完全冇苦瓜味，浸住o既豆卜亦同樣入味，苦瓜王表弟極力推介此味菜。
黑松露海鮮炆飯（$68兩位用）：依道餸係喺餐廳試業期間所研製出黎，所以未趕得及印入餐牌上，不過因客人反應熱烈，如果食客有要求，佢地都會特別煮製。濕濕地o既炆飯雖然海鮮料少咗啲，但味道清香甜美，黑松露味如果可以再濃啲就更加完美！
蛋撻仔（$26）：蛋撻仔落單後五分鐘內上枱，好明顯唔係新鮮造，所以只屬和暖，而且酥皮好腍，又唔夠香脆，不吃也吧 ！
杞子桂花糕（$26）：桂花糕毫無桂花香味，質感亦偏硬，又一失敗之作！
我地三個大男人對食o既要求都有所不同，不過得出o既結論都差無幾，覺得「小蝶」地方好大，不過其裝修就講明自己唔係走高級食肆嗰條線。餐廳雖然有位好客o既老闆娘及經驗豐富o既Sherry姐姐，但服務生當中亦有多位手腳緩慢，不大積極o既妹妹仔，令整體服務質素有所參差 。「小蝶」所提供o既菜式帶點創意，係一個正面o既方向，但其創意証實好多時會有反效果，營造出阿茂整餅o既情況，師傅要小心留意。
單憑餐牌上o既價錢黎睇，食物o既價格並唔算話好貴，不過埋單總算每人要比$300，XO仔同D兄又未夠飽，我地兩個就覺得唔係咁抵食囉 ！
Post
