雲來軒 (Closed)

之前睇飲食節目已經mark左呢間中菜廳，今日相約老公到此一聚。經過一條樓梯，梯間嘅側邊掛著一幅幅寶哥嘅招牌菜與雜誌紙。天花板以一幅一幅雲朵拼成， 同「雲來軒」的名字相合。入座及離開時侍應有親切的招呼。坐低時，侍應已略略介紹招牌菜，唔覺hard sell , 感覺舒服。普洱茶好濃好滑，老公一向都飲好似苦茶的普洱，所以佢不停讚茶好飲。前菜腰果脆口唔油膩，仲要越食越開胃。窩粑士多啤梨骨窩粑好脆，唔會有油膩感，佢脆到"卜"一聲，唔會腍或韌。士多啤梨和醬清甜，真係有骨俾你，出面好多酒樓都只俾肉而冇骨。醒胃話梅雞(半隻)話梅雖然已經係煮到腍，但我食咗幾粒，因為酸微微好開胃。雞肶好嫩，唔捨得咬走雞皮，因為啲話梅味入哂啲皮，甜甜地好香。三色椒好甜爽口。雪山花之戀好似幅畫咁，蛋白好滑，入面有一絲絲蟹肉和花支片，核桃甜美冇益味。侍應係我地食完每道菜之後都幫我地換碟，服務一流。**記住要訂位，當晚7:30已經滿座。