寶琳為食喵 (Moved) New Location

呢排捉得多喵喵怪，見到個舖頭名都覺得好似有聲咁！點解住西環嘅我會山長水遠咁一路向北，黎征服將軍呢？就係因為早幾日見到Utravel有個post 介紹將軍澳嘅隱世小店sss啦。我嘅第一站就係呢間寶琳為食喵啦!佢位處於寶琳邨嘅街市入面，冇乜方向咁嘅我一路喺屋邨嘅行人天橋度兜左好耐，先落到去地面，搞到零舍餓呀喂！街市入面都有好多唔同嘅食店，集中埋一齊。雖然話係街市，不過都算幾整潔嘅，又唔會話好焗，所以堂食都okay。為食喵外面有2張枱俾人堂食，我知道呢度嘅瑞士雞脾出名，但係太大隻我又食唔晒，又想試下其他小食，所以我就叫左雞翼芝士撈麵同炸燒賣。雞翼芝士撈麵（$22） 啲雞翼都係瑞士汁，啲雞翼好深色，好入味，又唔會太甜。芝士汁係有少少似新記嗰啲，芝士味都幾重，不過汁嘅份量就少左啲。炸燒賣（$10/ 10粒）真係超抵，1蚊一粒燒賣真係邊度有，仲要炸到外脆內軟，灑埋啲椒鹽，正，不過食完都幾口乾。食完呢兩樣嘢，本身想試埋隔離間寶琳粉仔，不過佢未開，唯有等下次啦！