金鶴拉麵 (荷李活道) (Closed)

尋晚去左試呢間拉麵。同平時啲拉麵店唔同嘅係，呢間啲檯同檯之間嘅距離好遠，可以坐得好舒服，唔洗逼住曬咁坐。每人都叫左一個一人套餐 $128，可以揀一款主食、一款小食同埋一款飲品。🍜金鶴雞白湯拉麵呢款視乎係呢間拉麵店嘅招牌。雖然我走蔥走筍，但碗拉麵上檯嗰陣望落都仲係好靚。雖然唔係揀極濃湯底，但其實呢個已經好濃，飲多幾啖都已經會覺得好飽。拉麵上面有一條條好似係牛蒡絲嘅野，浸湯幾秒咁食，脆脆地甜甜地，幾好食。但朋友話佢嗰碗啲牛蒡絲有啲苦，可能碗碗唔同。仲有兩塊雞胸肉同埋一大片叉燒。雞胸肉完全唔鞋，仲好有雞味，好好食。叉燒好大片，食落都幾香，幾好食。🐥唐揚炸雞張單寫三件，我以為會係三粒炸雞咁，點知原來每件炸雞都好大件！好抵！炸雞新鮮炸起熱辣辣，雞肉嫩滑。隔離仲有啲好似柚子鹽咁嘅粉可以點，點完好香好好食。推薦！🍢燒黑豚串有兩串，每串有三舊。燒得好香，好食。肥瘦相間，一啖食一舊個口感同味道好豐富。總括而言，我覺得呢間嘅雞胸肉同小食都好出色。湯底都幾好。如果下次再黎，可能會試多少少串燒同埋小食。