班蘭小館 (Closed)

星期四早上同事們又開始為LUNCH食咩而頭痛，公司附近的餐廳都差不多已經全部試過，今日有同事提出想食喇沙，經Openrice搵完一輪後，揀左呢間係西灣河的小館。雖然要搭一乘車先去到，不過訂到位動作快少少時間上都問題不大。我地訂左1點鐘枱，去到時雖然仍未需要等位，不過都已經差不多坐滿客人。餐廳唔大間裝修普通，空間都幾寬敞。午市套餐有6款選擇，專程來到我地當然係點新加坡菜色: 招牌海南雞飯、肉骨茶同新加坡喇沙，另外餐飲加$5可轉馬來酸柑特飲。招牌海南雞飯份量都幾多，雖然雞肉唔算好鮮嫩，不過唔太乾，味道都唔錯，午市$60都幾抵食。新加坡喇沙湯底都算香濃，可惜材料味道比較淡，份量都適中。同事食的肉骨茶藥材味都幾濃，不過配飯食比較淡口左少少。馬來酸柑特飲味道真係比平常飲的酸。班蘭小館的午市套餐味道唔算好突出，不過唔需要加一，$60左右一位，性價比都唔錯。