咖啡灣 (Closed)

呢晚睇完戲，同朋友諗緊食咩嘅時候，突然見到有間餐廳裝修得好夢幻，少女心即時湧現，朋友又想試吓，於是我哋決定食呢間啦! 入到去有靚靚裝飾同擺設，打卡就最啱。睇完 menu 之後，我哋決定先叫前菜同主菜，食完再諗吓食咩甜品。凱撒大帝沙律嘅沙律菜好新鮮，上面加咗沙律醬、麵包粒同煙肉，撈勻食令口感更豐富，唔錯! 櫻花蝦明太子煙肉意大利麵嘅意粉煮得剛剛好，夠彈牙，醬汁好惹味，食到粒粒明太子，鋪面仲有煙肉、櫻花蝦同木魚碎，撈埋一齊食會更香口，正! 香蒜帶子意大利麵有勁多炸蒜撒面，帶子都幾大粒，意粉炒得夠香，清清哋幾好味!本來見啲飲品同甜品都咁精緻，諗住食完正餐再慢慢嘆，點知啲主菜都幾大份，所以呢次試住甜食先。紅豆綠茶雪糕窩夫啲窩夫外脆內軟，食到蛋香又唔會過甜，熱熱嘅窩夫配上冰凍嘅綠茶及雲呢拿雪糕，冷熱交融，真係好滋味。題外話，食飯期間見到員工掃地，佢哋會推開啲枱櫈，小心掃乾淨每個地方，心裡不禁讚賞佢哋認真嘅工作態度。