第一蠔粉麵 (Closed)

個舖位係之前太子丸茶手作嘅舖位，地方唔算好大，尋晚大約9點左右去到，叫咗一個炸蠔餅同埋一碗蠔仔粥同朋友share，比起平時喺廟街同類型嘅鋪頭，佢哋用嘅唔係細細隻嘅蠔仔，而係用一啲大隻有咬口嘅本地蠔，食落去冇沙。先講下個粥底，本身有胡椒落咗去，所以都幾惹味，但同時間你亦都需要另外叫一杯飲品，以免過分口乾，跟餐要嘢飲只需要$8，但現時只係得罐裝飲品提供，抵唔抵飲見仁見智。另外炸蠔餅，同圖片中嘅擺位有少少唔同，但係仍然會食得出蠔嘅口感，新鮮上菜然後攤凍咗一陣再食，都唔會有大量嘅油溢出嚟，加埋雞醬食都幾夾。除咗主打蠔仔之外，亦都有其他日常見到嘅米線配搭，即使同行朋友唔鍾意食蠔，都可以一齊幫襯下小店，尤其係主打本地蠔，更加需要本地人來支持呀！