Shine (Closed)

食盡尖沙咀嘅朋友, 今日介紹咗呢間喺iSQUARE附近, 非常就腳又好食嘅西餐廳俾我。餐廳環境空曠, 座位都幾闊落, 部分卡位設於開陽窗邊位, 都幾有情調㗎。坐低先叫個小食。大大塊蟹餅炸至金黃酥香, 外表香脆, 內層則蓬鬆柔軟, 充滿蟹肉, 伴酸酸甜甜嘅菠蘿莎莎, 既開胃又解膩。肥美嫩滑嘅鵝肝, 油香撲鼻, 味道同朱古力雖然扯不上關係, 但口感就同朱古力好似, 細緻幼滑, 入口即化。多士夠曬香脆, 吸收曬鵝肝嘅油份。一碟只有3塊, 實在唔係好夠喉。豬架扒多肉少脂肪, 如果煮過龍好易造成肉質粗糙, 用慢煮嘅方法就最適合不過。經過啤酒浸泡以及慢煮嘅豬架扒切開說不上幼嫩, 不過亦唔會食到一絲絲粗糙嘅紋理, 啖啖都係肉, meat lovers應該會鐘意吧。