大樹燒烤 (Closed)

今日去咗厚福街H8嘅四川燒烤店 - 大樹燒烤。餐廳以暗燈為主，副有氣氛，加上水吧係類似酒吧嘅設計，好適合帶朋友放工黎傾計飲酒食串燒。今晚我地嗌左麻辣鴨血粉絲、燒牛舌、焗糍粑同一眾串燒。串燒可以根據自己喜好，自行加孜然粉同辣粉，雖然串燒紙上有寫大中小辣，但店員告知辣度係由客人自行調較嘅。串燒方面，我地試左豬大腸、雞皮、雞中翼、雞軟骨、蝦、牛丸、金菇肥牛、蒜芯、冬菇、菠蘿等等。我地嗌左嘅燒物太多，不能盡錄，特別推介既有大腸、牛丸同雞皮。串燒好香脆，加上餐廳每張枱都配有一個用火燒住嘅熱石板為食物保溫，就算慢慢食都唔怕燒物變凍。麻辣鴨血粉絲 - 麻辣湯底好夠味，粉絲較少，只係用過下口癮嘅份量。但味道好好，鴨血份量尚可。燒牛舌 - 燒牛舌係分開一碟上嘅，味道好好，夠爽脆。如果可以再厚切啲會更好。焗糍粑 - 第一次食糍粑，一食就愛上。呢到嘅糍粑皮好薄，仲要焗到好香脆，咬到去仲有糖漿流出黎，甜到入心，極力推介!