人和月雞煲火鍋店 (Closed)

同朋友係尖沙咀行完街，見天氣凍凍地就想食暖d，之後見到有間新開既火鍋店決定入去試吓。餐廳位於三樓，都幾近地鐵站，位置方便，裝修簡潔，同感覺都乾淨衛生。有三個價錢既餐可以選擇，我地選擇左中間價$298既餐。時間都好足夠有120分鐘可以慢慢嘆。一開頭就食左頭盤先，可以選擇自家韓式芝士雞或招牌麻辣雞煲或老檀酸菜魚。而我地就選擇左老檀酸菜魚，有得選擇辣度，我地選擇了最少的BB辣，有酸辣香，但食落又不會太辣，岩晒唔食得辣嘅人。魚無骨，同好滑。之後就食火鍋，選擇了藥膳養生牛奶鍋，一開頭就一盤五款牛送上黎，而且好貼心有標明係邊一款牛，而我就鍾意食嚴選牛下肩，肉質好嫩，重牛味。而朋友就鍾意食特級牛胸爽，比較少地方有得食，食落口感好爽，完全不覺得係食緊牛，幾好味。而另外仲有其他配料，墨魚滑，同蟹子蝦滑蝦，鴨血，餃，蔬菜，丸類等等，種類好多而且質素都不錯。飲品同甜品都係任飲任食，飲品有汽水同埋自家製飲品，我覺得蜂蜜菊花露幾好飲，幾滋潤。甜品不錯，有好多款配料，同豆腐花好配合，而且豆腐花都好香滑。