Delaney's Kowloon

Open Now

Now Closed

記得細個第一次去Delaney's 係喺灣仔嘅分店。嗰陣覺得呢個pub極有傳統英式風情，好多外國人喺度睇rugby或者英超，又多啤酒飲。之後因為灣仔間分店租約期滿而冇咗，我就多咗嚟尖沙咀呢間分店啦。難得今日同同事喺尖沙咀開會，開完會梗係happy hour連晚餐。雖然得返我哋兩個女仔食飯，不過我哋叫咗一打雞翼同一個辣肉腸Pizza。由於我哋都怕寒涼嘅關係，所以都係叫咗兩杯house red。兩杯紅酒一嚟到，已經聞到好香帶熟透嘅果味，再飲一啖，勁易入口，完全散發着車厘子同莓嘅味道，好有pinot noir嘅風格。之後雞翼同辣肉腸Pizza嚟到，雞翼炸得好脆，每隻都好肉地，配埋泰式辣醬，啖啖肉又香口，超爽皮。至於個Pizza今次就整得一般啦！薄餅底過多水分，黐住咗焗Pizza墊底張紙，中間位唔夠脆，變咗好大嚿又黏嘅粉團，唔係太好食。唯一係面頭都叫做多芝士同辣肉腸，所以我哋就挑晒上面啲料嚟食。總括而言，今餐最好嘅係可以好舒適、唔太嘈咁坐喺個酒吧飲住嘢、食住嘢傾計，炸雞翼唔錯，紅酒都好飲，完全滿足兩個女人不停呻氣嘅慾望。