雲香園小鍋米線

Open Now

Now Closed

唔知點解天氣凍我特別想食米線😆老公帶咗我嚟呢間隱世雲南米線店，話呢度啲湯底係每日新鮮慢火熬煮6個鐘喎，食過之後我覺得又真係幾好食。小鍋米線 $66有齊芽菜、酸菜、韮菜、蔥、芫茜，我就揀咗酸辣湯底，有啲肉碎幾惹味，辣度B B辣對我哋嚟好易入口又食到老火湯底嘅鮮甜味。配菜我就要咗雲吞、魚肉春卷、魚腐同埋蘿蔔，勁豐富。魚肉春卷其實係八爪魚魚肉春卷，有粒粒八爪魚粒好有口感，仲有蘿蔔都好甜好入味冇渣，雲吞同埋魚腐都正常水準。米線就好啱我口味，吸湯汁之餘又滑又順口。肥牛小鍋紅薯粉 $67老公鍾意食肥牛，揀咗紅薯粉，一樣係酸辣BB辣湯底，另外仲加咗豬肚、通菜。肥牛份量都幾多，唔好睇佢個樣咁樣，浸落啲湯度食好好味，一啲都唔會嚡。豬肚唔會似𡁻橡筋，有啲咬口又入晒味。通菜想話想話咁樣，吸咗湯汁都好食。秘製豬頸肉 $48呢個豬頸肉有啲似泰式，肉質爽口，出邊燒得焦香，食嘅時候沾上秘製醬汁，少少辣，好惹味。飲品方面，我哋就揀咗熱柑桔蜜$11同埋熱菊花物蜜$7，兩杯都潤喉，食完麵飲返杯好舒服。