高麗軒韓國料理 (Closed)

今次嚟尖沙咀呢間韓燒放題（$298/位），環境坐得幾舒服，油煙都抽得幾好，食完唔會成身味👍🏻我哋加左$38upgrade，可以食晒全部種類嘅嘢食，包括靚啲嘅牛同埋靚啲嘅海鮮。首先梗係第一時間食靚牛啦，3A雪花牛柔軟多汁，醃製嘅調味啱啱好，燒完沾上燒汁醬油食，好味😋Prime雪花牛係薄切，鹽燒嘅方法可以食牛嘅原味，油脂好香，原完唔會韌👍🏻法式羊架都好正，肉質柔軟，燒得外面焦香裏面保持肉汁，唔會羶。海鮮方面，我哋就食咗燒海虎蝦、扇貝、帶子同埋辣汁魷魚，其中海虎蝦幾爽口，帶子大大粒，燒得外面焦香，裏面嫩滑，好正😋熟食方面，燒銀鱈魚都好好味，大大件好厚肉，煎得外面同埋魚皮金黃香脆，裏面魚肉油脂豐富，好香超級滑😍招牌紅炆牛肋骨好入味👍🏻，肉質又淋又鬆化，蘿蔔都好好食，入晒味，又甜。我哋仲試咗個鰻魚石鍋飯豆腐石鍋飯夠晒熱辣辣，加入各種蔬菜拌飯，配上燒汁，就咁撈埋先好好食😋，再加上脆脆嘅飯焦，好正。鰻魚有兩大件，肥美甘香，唔腥冇骨。湯方面，我哋就試咗人蔘雞湯同埋牛肋骨湯，味道就一般般，正正常常，不過夠晒熱辣辣，都飲得幾舒服。呢度嘅汽水係任飲，可以自己出去雪櫃度拎。如果有埋甜品可以食就更加好了😆