臺坊 (加拿分道) (Closed)

今日想食台灣菜，於是去左位於尖沙嘴嘅臺坊食返碗台灣麵。鋪頭唔算太大，有兩排堂食位，亦都有就咁賣飲品。堂食都係先比左錢再上菜。我就叫左紅燒牛肉麵 +$5 轉刀削麵，飲品就叫左凍珍珠奶茶加仙草(+$5)去甜少冰。紅燒牛肉麵有牛肉同牛筋各幾件，仲有紅蘿蔔，白蘿蔔。先食一啖白蘿蔔，超級入味，一咬開熱辣辣嘅湯汁爆哂出黎，真係要小心辣親，白蘿蔔炆得好夠諗，好好食。紅蘿蔔都同樣入味，仲多左份紅蘿蔔本身嘅鮮甜味！牛肉同牛筋同樣炆得入味。牛肉咬落煙韌，有適當嘅筋增強口感。但唔會好難咬開。大大件嘅牛肉咬落非常滿足。而牛筋都炆得好諗，吸哂湯汁嘅香味，好滑，好軟熟。湯底就比較重味，所以配麵都可以食到湯底嘅香味，刀削麵比一般麵闊同厚身，感覺好易會煮到痴埋或者出面太軟，裏面太硬。但呢到刀削麵食落啱啱好，保持到煙韌嘅口感，但唔會痴埋哂一齊。想多d口感可以一試。珍珠奶茶茶味好濃，去甜天加飲到奶茶嘅香味。珍珠有咬口，仙草都好滑，飲落好清新，份量正常。臺坊可以話係性價比幾高嘅台灣菜餐廳！