尚香 (Closed)

好耐都冇行旺角喇，今日去兆萬買完野之後，就行下附近睇下有咩食～竟然比我見到有湯包食！！之前上海食過就好中意，希望返上海再食，點知依家香港都有luuuu!雖然有好多人排隊，不過都想試下，所以就一於排一陣，好彩都算排得快！好快到我！間鋪唔算好大，只有兩個人，鋪內有大大個蒸爐～我同朋友一人叫左一個蟹黃湯包～大大個湯包用紙盒裝住，所以唔洗拍拎上手會燙親。旁邊可以隨便自行拎竹籤同飲管，亦有醋提供比大家加。食法好簡單，就係用飲管戳穿湯包塊皮！不過唔知係咪我揀錯位置，d 湯好快瀉出來 >< 湯汁很多，我即刻用飲管吸，豬肉味唔算好出，不過湯味比較濃～飲到咁上下，就用竹籤整穿塊皮，食入面d 肉，內裡有唔少一粒粒蟹黃，質素 ok，不過價錢$45 有點貴！