咖啡弄 (Closed)

今日同朋友去到銅鑼灣，唔係太餓，又想食少少嘢所以就決定去咖啡弄。我地好好彩12點去，嗰陣無咩人，完全唔洗排隊，入到去已經有幾枱人坐咗喺度。我地叫咗個碎蛋沙律三文治，炭燒咖啡，同水果冰茶。因為朋友對奶類敏感，店員好細心，記得幫忙走晒所有奶類嘅嘢，例如牛油。個三文治好足料，啲碎蛋份量好足，又唔會太多沙律醬，同個麵包好夾，一咬落去，仲足料到咇晒啲餡出嚟，好滿足。仲有啲配菜，例如生菜、青瓜同蕃茄都好新鮮。炭燒咖啡就一般，帶點微酸，無一般嘅日式咖啡咁易入口。個水果茶就依舊出色，杯上加上檸檬同冰特別清新，啲水果都非常甜，啲橙同蘋果都好甜，同個紅茶好夾，值得一再試。下次嚟會再叫其他甜品！