三尖外賣煲仔飯

Open Now

Now Closed

香港人食煲仔飯一定係諗起廟街，不過去過都知環境衛生情況相當一般，去到都係食佢嘅風味。最近廟街附近向住彌敦道近寧波街就開咗一間三尖外賣煲仔飯，令你可以食到乾淨企理嘅煲仔飯，仲可以將風味帶返屋企。煲仔飯都有好多選擇，價錢亦唔貴。所有煲仔飯都係即叫即整，12分鐘就拎得，真係快靚正。店內安裝咗多個電爐，用嚟製作煲仔飯，非常專業。度身訂造嘅紙盒，仲可以將煲仔飯保溫達1小時。用錫紙兜裝住嘅煲仔飯，夠晒乾淨衛生。煲仔飯會另上豉油、蔥粒同菜脯，自己點調味都得。第一次幫襯，當然係試吓最基本嘅臘味煲仔飯。呢個大肉腸係臘肉配臘腸嘅煲仔飯，佢嘅用料都幾高質，食得出唔係平價嘅臘腸。正如佢宣傳單張所講， 飯焦香脆而不燶底，真係一粒飯都唔會嘥。海味三寶就有海龍蝦乾、原粒元貝同丁香銀魚，海味充滿鹹香，而且帶有鮮味，基本上唔使落豉油都已經夠晒味。除咗煲仔飯，呢度仲有原味焗蜆，焗蜆份量一啲都唔少，而且隻隻都好新鮮，加咗少少辣椒份外惹味。好開心發掘到呢間三尖外賣煲仔飯，而家喺屋企都可以食到又乾淨又有風味嘅煲仔飯啦！