漢和麵飽西餅

Open Now

Now Closed

偶然間來到瀝源邨睇醫生，見到呢間麵包店，又有小食賣，齋餡麵包都賣得好平，七蚊三個，超抵！唔係迷你包size喎！但我有興趣試佢嘅小食。門口招牌寫住大哥小食，漢和麵包， 一睇就知係舊式屋邨先會有嘅麵包店。 小食都好平，咁啱差唔多午飯時間，試下佢嘅炒米粉，同埋碗仔翅。炒米粉$10一碗，大碗， 份量真係超多，呢日太遲來買，賣剩嘅炒米粉全部裝滿畀我，好開心！不過，用料少d, 火腿，蔥，蒜蓉，就係呢幾樣， 米粉就好大量，味道方面比較淡， 唔記得叫佢加甜醬，辣醬，同芝麻添，可惜。碗仔翅，都係要大碗的，同炒米粉一樣的碗size, $15,見到佢真係裝滿曬。 加咗麻油胡椒粉醋。用料超多， 可能又係因為賣剩最後一碗，全部裝曬畀我，所以沉底的用料全部都畀曬我，啲湯的質地比較稀，但係用料豐富，有冬菇，粉絲，瘦肉絲，雲耳，木耳，好爽口。味道方面亦非常好味，鹹淡適中，加咗胡椒粉，麻油，醋，味道更好。推介食呢度嘅碗仔翅！下次會再幫襯。