糖室 (Closed)

考完試夜媽媽，諗住同個同學去食糖水慶祝下。南山邨有好味大排檔就不嬲都知，但原來都隱藏左一間幾有格調嘅甜品店，位置就隱蔽左少少，用google map搵左一排先排到，但黎到試過又覺得值得推介。舖面細細，數埋都唔夠十張枱，我地去到時更加係全店唯一一枱客。侍應遞上餐牌，真係估佢唔到有咁多選擇，中式、日式以至近年流行嘅台式吐司都有。今次就揀左食鐵鍋棉花糖吐司。熱辣辣嘅鐵鍋上枱後，棉花糖嘅香甜撲鼻而來，加上入面嘅藍莓、士多啤梨中和一下甜膩感，啱啱好。食到入面就見到吐司，因為鐵鍋嘅保護食到入面都仲係熱嘅，脆卜卜嘅多士仲有淡淡嘅蜜糖香味，夠飽肚，作為一個飯後甜品可能太過膩，但對於未食晚飯嘅我黎講就相當唔錯喇！好多時同朋友喺又一城食完飯都搵唔到甜品店，而家就有多個好選擇。食飽飯，行多兩步去南山邨，再食，咁先至盡興！