泰華餐廳

Open Now

Now Closed

行完山到樂華邨搵食，雖然屋邨唔細，但餐廳又唔算多，左選右揀先搵到呢間唔係商場內嘅屋邨茶記。星期日下午茶時間全場坐滿，眼見街坊多點盅頭飯，炸脾薯條多，我就選擇食炸兩，蘿蔔糕加奶茶，腸粉出奇滑，油條又夠脆，驚喜👍，奶茶同評語一樣奶味重，茶味少，但勝在夠滑。蘿蔔糕正常，粉多蘿蔔少，但味道比酒樓點的好味。老公點左牛丸米，凍檸茶，牛丸冇牛味，檸茶正常。今次驅使我要寫食評主要原因係想幫泰華平反一下服務態度，由入餐廳一刻幾乎滿座，只能撘枱坐2人位，後尾執枱姐姐主動叫我地轉張4人枱坐得舒服啲，落單姐姐亦非常有禮貌，埋單亦有講多謝哂。所以值得為泰華平反下。