龍順軒海鮮酒家

Open Now

Now Closed

依間龍順軒位於彩虹同牛頭角之間，可達商場嘅馬路只係通往彩德邨同彩福邨嘅一條掘頭路， 可以夠膽講呢間酒家就只係做呢兩個邨嘅生意。依間酒家响兩三年内已幫襯過好幾次。屋邨酒家自然都係大路燒味小菜。第一個菜就係特價菜清蒸龍躉仔$58，雖然今次條魚蒸老咗，不過骨唔多，啖啖肉，味道都唔差， 明顯係食價錢，海鮮喎！菜心炒牛肉，菜心還可以，牛肉就得鬆肉粉味，志在有蔬菜食吓咁啦。燒味雙拼，超好彩，廚房畀雞髀油雞味道就一股燒味店水準；叉燒就可以讚吓，幾年内響度食過咁多次都可以保持美味水準。肉質鬆軟，肥瘦適中，既有肉香又有脂肪香，鹹甜調味又剛剛好，是晚一路食一路眼見不時有邨民到燒味部外買，相信依個叉燒一定留咗唔少依兩個屋邨嘅街坊捧場客。是晚例湯，佛手瓜豬骨湯，粤式老火湯。除咗油多咗少少，無其他投訴。三餸一湯有海鮮埋單$359，份量其實夠三人食，所以大部分叉燒被打包，足夠一個人食多餐。