3rd Space (Closed)

之前食過蟲二招牌麻糬夾心班戟，一直都想再食，見出開上環就當然要探下蟲二姐妹店嘅 3rd space。今次揀咗鹽燒西冷薄切牛扒慢煮蛋榖米茶漬飯同濃濃黑芝麻招牌燒海鹽忌廉麻糬班戟，一杯Caramel Latte同Flat White。茶漬飯使用健康又煙韌嘅榖米，就算浸喺茶漬鰹魚湯好耐都唔會變糊仔，味道非常香濃，而且薄切牛肉肉質鮮嫩，配埋溫泉蛋拌入米飯，味道好有層次。店主介紹我地食佢最鍾意嘅芝麻口味麻糬班戟，芝麻香味非常濃郁，切開軟綿綿嘅班戟，內裡湧出澎湃嘅麻糬，配埋面層濃厚芝麻醬、燒海鹽忌廉同北海道牛乳雪糕，撈埋時令生果同燕麥片，多重口感非常豐富，甜品依然保持水準，果然冇令我地失望；兩杯飲品唔會過甜，配埋甜品甜度剛剛好。除咗食物吸引，餐廳內外環境都有特色壁畫，環境清靜，係閒休打卡嘅好選擇。