鮨亭 (Closed)

是日放工比較早，於是去咗屯門會合屋企人去食飯，由於佢係康景花園附近，所以想係呢邊解決晚餐再番去。呢頭一帶都幾多日本餐廳同小菜店家，經過呢間「鮨亭」門口餐牌啲晚餐幾吸引就入去睇睇，平日唔算太多人，坐得幾舒服。睇左陣餐牌就柯打咗一個一人前晚餐、鮨亭刺身太卷同三色丼。最先到嘅係太卷，雖然眼下只有四件，但每件嘅份量好大，用咗劍魚、池魚、三文魚、沙律醬菜做餡，都可以話非常足料，碟邊仲有少少柚子汁點蘸，不俗。接住一人前嘅沙律、吉列豬、麵豉湯最先到，沙律菜新鮮，對一人而言份量有多，而且內裡加入咗少許醬汁醋，食落開胃；吉列豬外皮炸得酥脆值得讚，內裡不足係，個人覺得豬肉調味唔夠，點沙律醬食兩舊有啲溜同乾，如果係配吉列燒汁可能更佳。而麵豉湯雖然係易煮嘅菜式，但每間餐廳嘅味道可以各有不同，呢度麵豉湯調味幾濃郁，成晚呢個湯真係功不可抹，有時食魚生都會好溜，飲淡湯消解呢種感覺又可以繼續食。其後賣相絕佳嘅三色丼到，丼飯裡面包括有三文魚籽、吞拿魚魚蓉、同海膽。意想不到地三色丼夠哂多料，一大注海膽係面，簡直大滿足。唔知由幾時開始鐘意食海膽，入口鮮甜濃厚，撈埋飯食一流。間中加少少三文魚籽一齊食，又多一種鮮味，兩個層次。