小曼谷泰國菜館

Open Now

Now Closed

小曼谷可以話係好多屯門友嘅食堂，我同老婆就係其中兩位，每個月都總有一兩餐會幫襯小曼谷。有時有朋友過嚟，我哋都會帶佢哋去試。小曼谷可以話係平靚正之選，雖然環境唔算好舒服，但真係成個氣氛都好有泰國風味同地道。就連侍應廚師都係泰國人嚟嘅，食物當然唔使講，食嘅時候真係會覺得自己去咗泰國咁。我哋今日叫咗泰式豬頸肉、香草辣椒海鮮炒河同馬拉盞炒通菜，另加一杯龍眼冰同椰青。泰式豬頸肉肉質彈牙爽口，佢嘅醬汁係我同老婆難以忘懷嘅原因，辣得滋味可口，唔知泰國雜貨店有無得買呢，定係佢哋自己調配呢，真心好正！香草辣椒海鮮炒河，食食下有個食客問我哋係咩，佢都想叫嚟試吓，當然要即刻介紹俾佢，因為真係好惹味，辣得好香，醬汁刺激開胃🤤，我同老婆經常會叫。海鮮份量都合理，河粉炒得剛剛好，咬落有彈性。馬拉盞炒通菜係我嘅至愛，今日嘅質素都好高，通菜好嫩好新鮮，醬汁好香好醒胃，好食！