同人鍋 (Closed)

冇食一排邊爐，呢排邊爐隱又起喇！今次就去到佐敦打邊爐！今次已經唔知第幾次喺係山林道搵食喇！呢間同人鍋好特別，係先食雞煲，後打邊爐，都幾創新下。鋪頭非常闊落，冷氣好夠，坐得好舒服，而且侍應服務好好，細心哋講解點樣打邊爐食海鮮。雞煲好香好足料，食落又唔會好韌，都幾滑下。我哋之後仲加埋啲紅薯粉落雞煲入面一齊煮，紅薯粉煙煙韌韌，口感好得意。食完雞煲，就開始打邊爐喇！我哋叫咗超級多火鍋配料，又肉又海鮮，超級豐富！火鍋肥牛自家製響鈴新鮮蔬菜水晶飽同餃子個水晶飽係我最鍾意嘅芝麻味，仲有抹茶味添啊！呢度嘅芝心丸同午餐肉好特別，第一次用午餐肉打邊爐，都唔錯！仲有好健康嘅芋絲啊！登登登凳！全晚焦點終於出場啦！就係一大碟海鮮！等我介紹一下啦！韓國蠔固名思義來自韓國，超大隻，又新鮮；有特大澳洲蜆，蜆肉超級爽口；青口都有好大陣海水味；仲有原隻魷魚，四隻大蝦，鯇魚片，最犀利就係四隻大鮑魚！鮑魚好甜又唔韌，打邊爐食鮑魚真係好豪啊！呢度而家做緊意大利雪糕推廣，只要你喺facebook打卡，就可以有免費雪糕一杯，有芝麻味、朱古力味同士多啤梨味等。山林道真係好多好野食啊！大家快啲去打邊爐啦！