Ilis (Closed)

上次同事帶我地為食組員4個係山林道呢間Iris點左2個二人餐食, 超豐富超正, 尤其係個法式羊架。😍 今晚同老婆係尖沙咀睇戲前決定帶佢黎撐枱腳, 因為老婆都好鐘意食羊架, 黎呢度食佢一定滿意。😁我地7點左右到餐廳, 客人仲未係好多。餐廳裝修簡約而有情調, 座位唔多, 就算坐滿客人都唔會太擠迫。原本我打算點二人餐, 因為二人餐$418有餐前小食, 前菜, 沙律, 餐湯, 意粉/飯類, 主菜, 仲有甜品同餐似, 超豐富, 不過老婆唔想食咁飽, 同埋唔想食意粉同埋飯。結果我地點左兩個主菜, 再加$30轉套餐, 價錢差唔多, 仲可以食到兩個主菜, 而且都有甜品食。😆套餐嘅沙律同餐湯份量都唔少, 今日嘅餐湯係蕃茄濃湯, 蕃茄茸好多, 相當醒胃。👍我點嘅主菜係烤12oz美國牛扒, 件牛扒比我想像中大件好多。😮 外層烤到金黃色, 用薯蓉墊起少少, 加埋烤香嘅配菜同芥末醬, 賣相勁吸引。😍西冷扒以海鹽黑椒簡單調味, 肉質鮮嫩, 五成熟熟度剛好, 口感軟腍, 12oz非常大件, 一個人食超級滿足。😋老婆份法式羊架賣相都好吸引, 以菠蘿掛起羊架, 羊肉好嫩滑, 以生果做配菜, 味道都幾配, 老婆都話好食。