四姐川菜

Open Now

Now Closed

由於太鍾意食辣野，間唔時就會返內地食辣野，無奈假日嘅時間返內地動輒都要幾個鐘，車費同時間都曬咗...所以一直都好想係香港度搵到啲出色既四川/重慶菜既店，最後終於搵到四姐川菜！*今次我地order中辣*蒜泥白肉切得好薄，肥肉同瘦肉分布均勻，入口亦唔會覺得肥，但就食到豬既濃味。加上個汁香而不辣，非常之夾。夫妻肺片有牛肚，牛展，牛舌等等。呢味餸開始有啲辣，辣汁帶酸加有香麻，非常開胃。不得不提，連啲花生都做得好出色！炸到極香脆，浸左係汁到既花生食到尾都一d淋都冇！招牌重慶水煮魚二人份量但勁多魚肉。肉嫩滑冇骨亦唔會夾散。一上枱已經好香，愈食愈麻辣，花椒落到足！墊底既薯粉出奇地唔淋仲要非常煙韌重好入味添！辣子雞軟骨食左幾款辣餸，出乎意料每一道既辣都有唔同。呢個辣子雞軟骨就辣得黎帶孜然味，炒得乾身食起黎唔會油淋淋！川式椒鹽蝦開左邊，炸到勁香脆，絕對可以食埋啲蝦殼，我連蝦頭都唔放過，有香濃嘅蝦膏！蝦肉結實鮮甜。食到尾上左碟油麥菜，清清地清返岩岩食既重口味野平衡返，好細心另外呢度係劃一收費按人頭計，今次我地2個人食左咁多野就每位$340。覺得係銅鑼灣食到私房菜，份量同質素都👍🏻👍🏻👍🏻，價錢算合理。