川府宴 (Closed)

身為川菜迷既我，最中二周圍試新野，朋友介紹呢間新開川府宴話唔錯，急不及待去左會一會。裝潢上幾有四川味道，一道仿古鐵門，牆上掛上變臉臉譜，令人享受埋視覺效果。由於兩個女仔食唔到多野，所以叫左夫妻肺片，有牛肚，牛𦟌同牛脷，全部經過滷水之後入晒味，之後源拌上麻辣醬汁，基本上食到滷水香同酥辣感，下面墊上川菜最中二既拌菜—萵筍，爽脆口感，的確唔錯。另外叫左碗擔擔麵，幼滑麵條拌上香辣豬肉碎，花生碎，酸菜碎，麻而酥辣，三兩下就食晒。雞絲粉皮則屬於嫩滑型，所以粉皮比較難夾，雞絲連同爽甜青瓜絲，香口芝麻，些許麻辣，都係飽肚之選。身為健康女性， 菜都算半個主食。香肉炒花菜，花菜香港比較少見，係好脆好有口感既一種菜，配上四川秘制香肉，一打開蓋，香味撲鼻。講起香肉，口感似我地既臘肉，但氣味似煙肉，唔油膩之餘仲好香，成鍋菜精華所在。香酥珍珠蠔都係第一次係川菜試過，挑選左五蚊銀大小既珍珠蠔，大火快速炸，所以蠔肉保持唔縮水而且仲好鮮滑，配上特制香辣粉，最重要係唔油，食晒成碟都可以。甜品係女士必食，的地點左一碗紅糖冰粉，用上黃糖以及薑汁做甜品既底，配上口感Q彈煙韌冰粉，仙楂片，杞子，提子乾，健康首選。