川府宴 (Closed)

銅鑼灣嘅永光中心一直都係美食集中地，今次我同老豆去咗最頂樓既川府宴。不過我同老豆食辣都係勉強，所以上去嘅時候有少少膽戰心驚。入到去餐廳嘅格局比較高檔，另外燈光比較昏暗。作為酒鬼一見窗台擺滿酒瓶就興奮不已。牆上甚至掛左臉譜，令餐廳嘅中國色彩更豐富。我同老豆總共叫咗五道菜，第一道係前菜，叫涼拌麻辣魷魚。魷魚切到細細粒，口感軟腍完全唔韌，香辣味十足，加左菜一齊食會冇咁辣。呢款前菜同一般魷魚沙律非常唔同，所以都值得一試。第二道菜係口水雞。雖然口水雞下面有好多紅油，不過其實麻辣程度比較溫和，並唔係死辣嗰種。肉質幾嫩滑彈牙。之後主角出場，就係水煮黑豚肉。平時水煮魚同水煮牛肉就食得多，今次第一次食水煮豬肉，仲要係高貴黑豚肉。黑豚肉份量唔少，肉質非常嫩滑，肉味超香。其餘配料仲有萵筍、薯粉等等。第四道菜係川式炒米，米粉口感比較濕潤，同乾身既港式炒米粉截然不同，食完唔會覺得燥，個人更喜歡呢個川式炒米。最後一道菜係健康彩虹菜，包括紅椒、黃椒、椰菜花、椰菜、紫色椰菜同百合。每一款菜都非常爽脆，見到咁多顏色嘅菜式即刻心花怒放。因為老豆請食飯嘅關係，今餐比較豐盛，期待下次老豆再請食好野，一齊越食越辣