彩龍茶樓

Open Now

Now Closed

今日入荃灣行山，先到川龍彩龍茶樓飲茶。呢間茶樓係一間貌似村屋嘅建築物入面，下層上層同外面平台位置都可以用餐。不過要有心理準備假日入嚟飲茶的人非常之多，等位係一件好痛苦的事，基本上每張枱都有人等緊。等到枱之後，就開始體驗呢度最大的特色 —— 全自助用餐體驗：由基本樓面開始，收拾上一手食完嘅碗碟，自己抹枱，自己開茶，拎餐具，到出去拎點心，都真係全自助；有嚟過嘅茶客相信已經習慣。餐具建議最好自己再認真洗洗；至於點心食物全部都係自己拎張卡出去點，一般傳統茶樓嘅食物呢到都有。蒸點係我哋覺得最好食嘅，鵪鶉蛋燒賣嘅燒賣唔係就咁一舊豬肉，而係好似真正燒賣咁有蝦肉喺入面；雞扎嘅材料好豐富，味道同口感都好好，係令人滿足嘅一款點心；煎釀茄子上面嘅魚肉煎炸得香脆可口，茄子腍身多汁，非常飽滿；嚟到當然要點腐乳西洋菜，雖然係貴，但係菜真的是新鮮好食。至於個炸豆腐就普普通通，下次唔會再叫。總體而言，呢度嘅食物水準，尤其是蒸點是十分出色；環境衛生則未必人人接受，亦不要預期有服務（唔係佢哋唔好態度，只是根本冇咁多人手去服務），所以基本全程都係自己自助。不過呢點亦都係好多專程入黎嘅原因，食嘅係一份傳統茶樓的地道情懷。