露絲咖啡

Open Now

Now Closed

去到火炭工廈重陣，難得搵到一間坐得舒服少少，冇咁趕客嘅餐廳。單睇餐牌真係好多選擇，原來依間係火炭辦公室名物。食物方面 - 午餐照燒雞扒鯖魚飯︰加購餐湯已經有四款選擇，羅宋、忌廉、南瓜、仲有一款湯唔記得。原本想點南瓜，聽講太受歡迎，已經售罄了。最近試基本野 - 羅宋湯，意外驚喜。絕對唔係是旦求其例湯咁簡單，滿滿一碗濃湯加雜菜料，幾粒真正牛肉粒。飲起嚟舒服，香濃牛肉味，酸甜度剛好，令人開胃。大件厚雞扒肉質嫩滑，又唔會雪藏到完全無雞味。鯖魚外圍煎得脆口，厚厚一層魚塊，用料十足。少少魚咸香，細心附上檸檬塊好開胃。照燒汁微甜濃郁，白飯偏濕軟，加上蛋絲增添味道層次感，無意間就食晒全部白飯。總結︰工廈區一般餐廳都係打工仔速食店，露絲咖啡唔趕客，座位算闊落，上餐速度快。如果跟同事一齊午餐，可以選擇慢坐亦能快食，兩者兼得。價錢相宜、食物味道、材料質素、份量等，全部都用心製作，性價比中高。