掌壽司 (Closed)

燒原條黃魚一夜干 HKD188將黃魚切成一半再攤開，面積大概同兩隻手掌差唔多。燒到啱啱好，魚皮乾脆，帶焦香之餘，唔會太燶，而魚肉就嫩滑多汁，唔會好似鹹魚咁乾硬，簡單啲講就係外脆內軟。 不過因為經過一夜干處理，所以食落一定會覺得有少少鹹，最好就係配埋碗白飯一齊食，我諗食兩碗飯都絕對唔係問題。時令壽司盛 HKD388配廣島蠔刺身+脆炸豆池魚+日式濃湯熱稻庭原本9件壽司(加拿大海膽、松葉蟹腳、油甘魚腩、赤身、帆立貝、活赤貝、甜蝦、火炙左口魚邊及三文魚腩)索價388蚊，未食都已經覺得少貴，食完之後，就更加覺得唔值呢個價錢。 雖然話有送兩隻廣島蠔刺身，但壽司就麻麻地，一來壽司嘅配搭無乜特別，二來魚生嘅質素比較普通。例如加拿大海膽咁樣，望落雖然都算新鮮，可以見到好清晰嘅顆粒狀，食落無乜腥味，但只有好淡嘅甘味，唔夠濃郁。 而廣島蠔就大隻肉厚，但味道比較淡，可能因為產地問題，所以無乜金屬味同海水味，亦都無乜特別嘅甜味，淨係食到好淡嘅蠔味。 唯一想讚嘅係佢嚿壽司飯，飯粒本身豐盈飽滿，而且飯粒同飯粒之間有空氣感，唔會好實咁黐埋一嚿。