Precious (Closed)

自從公司搬咗嚟牛頭角工廠區後，我哋每日都冇啖好食，隨咗食大×樂或飲茶外，周圍都冇咩餐廳食肆。得知隔離工廠大廈有間似樣啲嘅西餐廳，我哋當然要試下啦。午飯時間梗係訂定位穩陣啲啦，我哋準時12點45分去到即刻有位。原來佢呢度有分時段，如果12點45分前埋單走人或者13點45分後入座就會平啲，冇計啦，我哋冇得選擇食飯時間，實係食最貴果個時段啦。餐廳租咗兩個單位，地方唔算大，坐位都好迫下，內裡環境昏昏暗暗咁幾有情調嘅，都好嘅黑黑地見到啲唔想見嘅同事都當黑得濟睇唔到  睇下餐牌先，每日有A-G餐選擇，我就要左個C餐白酒蜆肉意粉食下先，午餐包一件多士和湯，熱飲加4元，凍飲加6元。先嚟個餐湯，粟米湯濃淡適中附送牛油多士 白酒蜆肉煮扁意粉蜆肉都好肥美飽滿，鮮甜多汁，意粉伴以甜椒，有點點蒜香又有香草嘅清香，唯獨唔係咁覺有白酒味，但總括嚟講都係好食。另外，同事叫的A和B餐，略嫌份量比較少，女仕就應該夠食，但男仕就未必夠食。同埋見到隔離枱叫個烤雞扒漢堡睇落都幾大件，同埋賣相都唔錯，下次再去試下先。