Bella Shine (Moved) New Location

黎到觀塘搵食，又唔想同人係APM逼，緊係黎工業區呢邊食啦。對上一次去Factory99，今次試下呢間「日式」Cafe。上到黎四樓，一出Lift見到間製衣鋪，仲以為去錯，如果可以整返個顯眼d既標示會更好。是日沙律 - 都幾特別，因為用壽司豉油做汁，菜就無話新唔新鮮，標準野。西蘭花忌廉湯 - 非常Creamy，西蘭花味略不足，可能係因為食左個沙律先，個口有陣豉油味，所以覺得呢個唔夠味。是日餐包 - 入面有無花果同提子。有片牛油喺我地坐低之前已經擺左喺枱面等食包時用，但係我地無用到，因為感覺擺左好耐....龍田炸雞配豬骨湯烏冬 - 日式炸雞，雞有雞味值得提一提既係個烏冬，夠彈牙又唔會太韌，一食就諗返起喺日本四國食既烏冬。湯底奶白色，應該用左唔少時間煲。日式滑蛋豬軟骨飯 - 略甜，豬軟骨一咬即溶。但係唔明點解話係日式但飯唔係用珍珠米...如果用埋珍珠米會令個飯更加完整。隨餐附送兩杯冷熱飲品，咖啡唔錯，值得一試。