炊豕店 (加路連山道) (Closed)

難得今日黎銅鑼灣做野，先同同事一齊食個久違了的Happy Lunch。揀左呢間係加路連山道，勁多好評嘅小店。12點未夠就黎到，岩岩好唔洗等位直接入座。小店專做豬扒料理，就試一款日式風味嘅大阪燒豬扒撈粗麵，加多杯飲品，埋單＄74。一上菜，嘩一聲，乜豬扒可以巨型到咁，金黃色仲相當厚實，炸得好透。上面唧左大阪燒汁、蛋黃醬，仲舖滿左木魚碎，真係大阪燒黎架。豬扒炸到脆卜卜，炸皮唔算太厚，咬開豬扒仲好腍，充滿肉汁。原味已經好食，再加上大阪燒醬汁，多一點日式風味，仲無咁膩。粗麵底幾爽口，加左少少甜豉油。實在好熱氣，但令人不禁一口接一口，食晒碗太飽足，之後飲啖茶吧。