冰雪公主 (Closed)

適逢男友生日，佢平時喺附近剪頭髮，見好似唔錯所以提議食呢一間，點知完全後悔！一入去，環境確實唔錯，設計幾精緻，又有韓國歌聽，非常合心意。坐低即刻有侍應拎兩杯水過黎，但竟然係用即棄膠杯裝，有少少扣分，不過見難得有店鋪可以一次過食埋甜品，原本真係好期待，點知.....落單半個鐘先黎第一碟韓式牛肉炒粉絲，非常細碟，但味道還可以，有辣味幾開胃，不過好油，食完成碟都見到啲辣油。而跟餐嘅凍咖啡，唔知點解好似有好多水，啲糖喺唒底，完全唔均勻，比茶餐廳嘅仲差！之後再等咗一陣，個石鍋拌飯仲未黎，叫侍應幫手催促下，話因為即場整要耐少少，呢樣唔係應該落單嗰刻就講？到我已經食完粉絲，男友個飯仲未黎，再15分鐘後終於出現，足足等咗一個鐘有多，個飯好難食，好乾冇咩味，淨係好多芝麻味同類似雞軟骨嘅味道。個雞肉簡直係難以入口，又乾又食唔開，跟餐杯奶茶同飲奶係冇分別！最後連甜品都冇叫就走，平時好少批評啲餐廳，自己又唔係食家，但今次真係食到一肚氣，忍唔住寫第一篇食評！