溢溢掂 香港味道 (Closed)

聽同事講呢條街已經變成小食街, 今天來八吓有乜野正店先。快閃一看有餃子店，海南寶寶、越南包、台式飲品等。而最吸引我是名字幾攪笑的它是吃車仔麵的「溢溢掂」。種類十分之多睇到我眼花撩亂，午飯過後有較為經濟的下午茶餐 $33「一個街頭碗仔翅＋一個肉操撈麵」其實我對碗仔翅一向麻麻地，因為吃到的永遠是杰撻撻，好似糊仔一樣。今天即管豁出去，試下這裡皇牌產品。麻油、胡椒粉是吃碗仔翅的膽和腳，必加！街頭翅材料有粉絲、東菇絲、木耳、肉碎等，均切得大細均一，基本上一口已經將所有材料放入咀巴內，入口杰度恰好，湯底調得正，味道又香又鮮。肉燥米缐墊底的米線份量吾小，上面是自加製肉燥，基本上整碗的靈魂就是它。我去過台灣吃當地肉燥，反而印象麻麻，因為加入太多肥豬肉，令人感到好油，這裡用上以瘦肉為主並加入香菇粒，切得碎又保持咬口，醬汁夠濃夠香，唯一問題是米缐較濕亦未能掛汁，下次必定要肉燥配白飯吃。冇睇錯「即磨咖啡」只售$8咁抵冇吾試的理由吧。水準大概如大家樂質素，非咖啡店可以掂得冲即溶咖啡比客人飲，絕對要表揚！富咖啡香，略欠濃郁，但絕對飲得杯落。