Pho Bar (Closed)

中環既利源西街非常狹窄，充滿各種街檔，但其實兩旁不乏好餐廳，今日中環上班族帶我去左Pho Bar。Pho Bar如利源西街一樣狹窄，不過餐廳安排更多吧枱坐位，所以出入都算暢順。Pho Bar主要賣Pho同喇沙，小食亦有豬頸肉、薯條之類。喇沙賣相幾靚，可以見到所有食材，包括豆卜、魚片、蝦、蛋等。米線口感爽滑，湯底散發濃濃蝦香，不過無乜椰香味。食晒啲麵之後，湯底仍然有一部份，證明麵條唔太吸湯，令整碗喇沙唔會變成撈麵。朋友叫既「至尊」並非浪得虛名，食材數之不盡，包括生牛肉片、牛丸、牛柏葉、牛展、札肉同牛腩。湯底味道幾濃，而且唔會飲到好口渴。對我嚟講最重要係可以自選配料，因為我個人好唔鐘意芽菜，但自己經常忘記走芽菜。冰山燒豬頸肉幾香口，不過有啲油膩，包埋生菜一齊食會好啲。平時餐廳既薯條離不開黑松露醬或蕃茄醬，但Pho Bar既紫色配日式鹽味薯條有驚喜，竟然有明太子醬。一蘸明太子醬已經不能自拔，明太子醬唔會太鹹，加上薯條熱辣辣兼香脆，配搭非常出色。每人叫左一杯奶茶，奶茶偏向港式味道。食完之後有發現同一條街令我感興趣既餐廳，下次再介紹大家。